Жаңалықтар мен оқиғалар
ҚТКФ «Magistral Awards» сыйлығының лауреаты атанды
2025 жылғы 19 желтоқсанда Астана қаласында көлік пен логистика саласындағы Еуразиялық Magistral Awards – 2025 сыйлығының лауреаттарын марапаттау рәсімі өтті.
«Қазақтеңізкөлікфлоты» ҰТКҚК» ЖШС (ҚТКФ) екі номинация бойынша лауреат атанды. Сыйлықтың сараптамалық кеңесінің дауыс беру қорытындысы бойынша ҚТКФ-қа келесі марапаттар берілді:
«Көлік кешеніндегі үздік HR-бастамалар» номинациясы бойынша — «Қазақстан Республикасының сауда флоты үшін қазақстандық теңіз кадрларын дамыту бағдарламасы» жобасы үшін статуэтка.
2024 жылы «Қазақстан Республикасының сауда флоты үшін қазақстандық теңіз кадрларын дамыту бағдарламасы 2025–2028 жылдарға» бекітілді. Бағдарлама аясында ҚТКФ мектеп түлектерін «кеме жүргізу» және «кеме механикасы» мамандықтары бойынша Қазақстан-Британ техникалық университеті жанындағы Қазақстан теңіз академиясында оқытуды қаржыландыруды көздейді. 2025 жылғы қыркүйекте осы Бағдарлама бойынша алғашқы 10 студенттен тұратын топ оқуға кірісті. ҚТКФ оқыту шығындарын, тұруды, шәкіртақыны және компания кемелерінде жұмысқа орналастыруды толықтай өз мойнына алады.
«Цифрлық логистиканың көшбасшысы» номинациясы бойынша — «Флотты коммерциялық пайдалану» ақпараттық жүйесі үшін лауреат дипломы.
2025 жылғы шілдеден бастап ҚТКФ «Флотты коммерциялық пайдалану» ақпараттық жүйесін әзірлеу жобасын іске асыруда. Бұл — Қазақстандағы теңіз тасымалдаушысының барлық операциялық және коммерциялық қызметін қамтитын алғашқы кешенді цифрлық шешім. Жүйе рейсті жоспарлаудан бастап оның аяқталуына дейінгі теңіз логистикасы процестерін біріктіретін, ҚТКФ қызметкерлері мен логистикалық серіктестер үшін бірыңғай цифрлық кеңістік қалыптастыратын тұтас интеграцияланған платформа ретінде жасалуда. Жобада жасанды интеллект пен деректерді талдау технологияларын қолдану қарастырылған, оның ішінде көлік құжаттарын автоматты өңдеу, жүк жоспарлауды оңтайландыру, тәуекелдерді болжау, ETA/ETD есептеу және мерзімдер, шығындар мен экологиялық факторларды ескере отырып маршруттарды модельдеу бар. Жүйе порттық, кедендік және логистикалық платформалармен жоғары деңгейде интеграцияланатын болады және ұлттық флотты цифрландырудың негізіне айналады.
Magistral Awards — көлік және логистика саласындағы Еуразиялық сыйлық, ол көлік инфрақұрылымын дамытуға, халықаралық ынтымақтастыққа, цифрландыруға, тұрақты дамуға және кадрлық әлеуетті нығайтуға қосқан үлесі үшін компаниялар мен жобаларды марапаттайды. Бұл сыйлықты алу компанияның халықаралық деңгейде мойындалғанын және жоғары кәсіби деңгейін растайды.
Фотогалерея
